5大聯賽難得進入短暫歇冬，當收爐唞返十幾日。英超一向鍾意打殘球會，難得今年有得休息，估計大利爭今屆兩大歐洲盃賽。同人唔同命，忙緊護級嘅紐卡素飛咗去沙特，見油王老闆，贏咗波唔尷尬又可以度假；列強下月賽程則轉密，其中車路士要踢英足盃、世冠盃、歐聯同英聯盃決賽，舟車勞頓；但防線兵力唔足，將帥關係又一般，係最有機會下半季跌watt嘅強隊。阿仙奴獨憔悴，本月連失兩盃兼近4仗一球不入，即日起唞到2月10日先喺英超作客狼隊，下月只踢2場；而全軍亦準備飛去阿聯酋散心，由頭做起，下半季再爭四哥。主帥達sir後生改革夠狠，但排陣未夠功力，當務之急解決前隊長奧巴美揚去留，同場內紀律問題；否則來屆就算打得返歐霸也冇太大意思，還望呢位少帥出入平安，勿第3次中新冠肺炎。足球無大事，不如留意即將推出嘅真人紀錄片系列《我係佐真娜》，C朗嫂講點樣飛上枝頭變鳳凰嘅內心世界，相信連曼聯主帥蘭歷克都會有興趣知道，點樣臣服呢位葡國球王。
日報