黑貓變老虎
英超升班馬近年戰績差劣，最慘前季升班嘅盧頓，如今淪落英甲。強如森林喺三年前夏天破英超紀錄狂簽21位新球員，該屆都係尾五過終點，捱足兩季先發到圍，今屆升呢歐霸。升班馬近年出閘又例脫腳，單計對上兩季6隊頭輪，只夾埋攞得1分；但只見「黑貓」新特蘭闊別英超8年重見「光明」，首場大炒鎚仔幫，啱啱仲簽入今夏第12位新兵嘅法國中堅。有錢盡洗，喺近年升班馬嘅常態，但唔得多過得；「黑猫」獨特傾注法語同非洲元素，Big Six以外季初起碼係一大話題。
黑貓上季喺英冠用人同踢法已經好唔同，法國教練利比斯教一季功成；難得兩大殺手美耶達同伊斯多各擅勝場，又冇俾人撬走，兩個竟然喺第一場踢英超分列正、副選都入到波，情況罕見又珍貴。請到瑞士隊長格列沙加去東北搵食，振軍心又係生招牌；隊波更反近年英超傳統，新兵已有7位非洲人，唔怕下年初去晒踢非洲盃冇人用？新埋班開個靚頭至重要，下場作客般尼，之後主場鬥賓福特，博到英超3連勝，黑貓都變老虎﹗