今年最後一個國際賽期即將展開，有人借機休息，有人會好緊張。歐國外會上演最後兩輪分組賽，出線大局多數已定，不用緊張；未穩陣嘅強隊有葡萄牙、德國同法國，但葡、德最後兩輪全對魚腩隊，緊湊啲嘅係C組，搞局嘅北愛爾蘭要先迎戰荷蘭打生死戰，唔贏就提早玩完。北愛教頭米高奧尼爾，教咗8年，最叻係上屆入歐國盃決賽周分組賽贏過烏克蘭。教國家隊長期悠閒，有啲功績、隊波又難發圍嘅，都會揾路跳船，佢忍到上周先肯應承為英冠史篤城救亡，上周五兼住兩份工，為新東家操咗一課，呢支中部軍即刻作客大捷逃出榜末，跟住又要返北愛執埋手尾，先正式投入新工。
紐卡素領隊布魯士話，好多球會領隊驚每年最後一個空檔，假期變死期；佢今年唔怕，因為啱啱喺聯賽連勝。現時英超下一位被炒大熱，係阿仙奴嘅艾馬利同修咸頓嘅哈辛赫圖，換波士已成最快捷嘅救亡方法，但佢兩位上任期短，未必咁快玩完，反而見底嘅熱刺，名帥樸治天奴最想自我放逐。