艾馬利有吉士

英超首輪好正路，真正列強齊開門紅；好似阿仙奴咁，換咗波士，主場對住衛冕嘅曼城繼續冇得揮，同雲爺爺末代冇分別。要俾機會新班子，又話曼城大超班，阿仙奴輸波合理；一場勝負從來唔係終極審判，但咁大場波，搵得幾場法甲經驗嘅新人古安杜斯擔大旗，拍住一向唔夠速度、放波慢嘅格列沙加打雙防中。古仔踢法無疑瀟灑但仲好嫩，留番踢歐霸盃先練佢會啱啲；呢種自殺行為，即時想起雲爺爺當年喺阿仙奴踏入第二個10年起，用「巴西神童」丹尼臣同「假韋拉」迪亞比打防中，長期折磨廠迷一樣咁敗筆。奧斯爾繼續夢遊球場、左閘焗用新人變大缺口、唔敢先用季前好fit嘅拿卡錫迪打雙箭頭，統統可以理解，但鬥曼城敢棄用艾利尼同盧卡斯托拉拿，中場佈防縮得後又唔夠截擊力，艾馬利首戰英超唔合格。

下場阿仙奴作客撼車仔，當你想起對手擁有世界級防中尼高路簡迪，又睇下艾馬利仲敢唔敢再用呢位「新契仔」，向大師兄兼法國世盃冠軍猛將挑機咁大膽！