曾訪問湯鎮業。湯兄明白事理，沒一味厚古薄今──很多老戲骨愛來這套，抬高自己。
「嫌新人貪玩？吾輩當年不蒲嗎？」他話鋒一轉：「不過，現在藝員無以前咁『聚』，倒是事實。
「以前我們困在錄影廠或外景荒山野嶺等埋位，百無聊賴，不做白不做，便聚在一起談論劇本，度精啲對白，焗住搞好部戲。後來不會了。」
關鍵在於手機。以前未有，有，大水壺亦只打出打入，功能簡單，無足分心，果如湯鎮業所說，稍具上進心者寧願精益求精吧。及至smartphone一出，目不暇給，等埋位不怕悶，大把嘢覆，大把嘢玩；演出，做夠便算，遑論台前幕後溝通度戲了。即所謂「唔聚」也。
推而廣之，各行各業如是。去餐廳點菜，問侍應介紹，年輕侍應茫然不知。怎會不知呢？與廚房朝夕相對，耳濡目染，總識飲識食吧。但因為手機使人無事忙，和同事打牙骹的時間減少，各自各篤篤篤，又是做夠便算，難言增值。
過往，售貨員即使沒店佣，看舖發呆，不如主動向顧客搭訕，落落嘴頭，就做成一宗生意。今時今日所見，靠smartphone作解悶神器，懶得行多步了。
常說手機反而加深人隔膜加深，比較感性；理性地，手機直接影響工作質素和晉升啊。Google原意萬事通、包教曉、無遠弗屆。沉迷上網，卻首先令你忽略眼前事物，職場失色，始料不及。