古天樂入行33年嘅首個紅館個人騷圓滿落幕。離港冇得入場嘅我，睇網上片段都感受到現場觀眾好興奮，網民反應亦相當正面。有趣嘅係，大家唔係讚佢歌精舞勁，而係讚佢係個落手落腳為員工創造機會嘅好老闆。一個資深藝人搞騷，展現出來嘅係好僱主嘅一面，實在十分少見。
大家都知道紅館係香港嘅神壇，香港人成日質疑某某憑咩喺紅館開騷。古天樂並非歌手出身，講真亦只得《今期流行》同《男朋友》幾首經典名曲，跳舞都被人嘲笑為主。所以佢專心拍電影後，咁多年來一直好少公開演唱，亦唔會再跳《今期流行》嘅「拜神舞」，但今次演唱會就一次過滿足晒大家多年來嘅要求。其實睇得出佢跳唱都好唔自在，唱自己作品同翻唱其他人嘅歌真係好勉強，但就叫做突破多年心理關口，觀眾亦俾足情緒價值。
由於古天樂個人作品唔多，每場演唱會都靠嘉賓撐起，多到可以話係一個「拼盤騷」，呢種明明係觀眾近年最嫌棄嘅模式，加上嘉賓名單唔係個個都咁受歡迎，有啲仲幾受爭議。奇妙嘅係，觀眾並冇嫌棄，當party咁睇。香港樂迷近年睇好多國際級大騷，愈來愈難滿足，但古天樂個騷能夠達到以上兩個境界，我相信係場內及場外嘅人都唔係以一個睇演唱會嘅心態看待呢個騷。
古天樂近年曾傳出財困，要「撲水」開戲，是真是假我唔知。不過依家經濟低迷，成個娛樂圈都冇咩工開我諗大家都知。古天樂作為老闆，選擇開騷做自己唔係擅長嘅事，娛樂大家，更為旗下員工同業界創造表演同工作機會。台前藝人到幕後等，每個崗位都因為呢場演唱會而有嘢做。觀眾睇到嘅唔止係表演，而係一個藝人同老闆用自己嘅力量去支持整個行業。呢種瞓身救市嘅老闆精神，令大家接受表演嘅瑕疵。
逆境求存，影帝唔怕做小丑，古老闆可以話係用行動推翻「天命最高」。
ADVERTISEMENT
