上星期去咗睇P1X3L同5G個騷 ，個場唔大，網上討論度都唔高，但現場覺得好有一種溫度。
一直覺得P1X3L係悲劇人物，第二屆《全民造星》出嚟，當時ViuTv嘅資源全力放喺MIRROR、ERROR度，唔想分薄，就同環球合作，音樂方面嘅發展由環球話事。頭兩年條路幾唔順，ViuTv亦只能夠透過電視節目俾機會佢哋。未出道已經有《大海男兒》，之後又Mike導又劇集盡谷人氣，但都係半紅不黑。好彩終於等到P1X3L x 5G騷 ，入到屋討論度又高。睇個show我見到：
1/ Phoebus成日俾人話正經，但佢同sica 一齊跳唱《哈姆太郎》，仲要自嘲「免費巴士」，我對佢改晒觀，發現佢為咗表演係可以放低偶包，咁係尊重舞台嘅表現。
2/ George出道嗰陣，講真我覺得佢只係一位死MK仔，成日講嘢同跳唱都冇氣冇力咁款。但個show佢好似變咗第二個人，眼神非常銳利，跳唱進步好多。我覺得同佢上年拍完《那年盛夏我們綻放如花》好有關係，好似《男兒當入樽》裡面嘅三井壽，原本無所事事撩事鬥非，因為遇上籃球，突然有焦點，有決心。
3/ Marco係3個裡面最入屋嗰個，勤力又帶俾觀眾一種戇居居嘅純真。三人嘅10分鐘talk show竟然好好笑，我相信係有ERROR軍師阿暉(麥可暉)同梁祖堯嘅幫手，加上佢哋演繹流暢，明顯排練充足，同埋代表佢哋感情一定係好。夾band先夾人，我對佢哋嚟緊5月底演唱會，甚有期望。
4/ 5G方面，Ash我第一次聽佢唱live，唱得超級好。佢自從同MC行超級市場，一直被追擊(呢個係男女不平等嘅例子，男方一早已經冇事，演唱會仲拎返件事出嚟笑，女方就繼續被道德高地擲石)，好彩嗰晚我見到佢有返自信，壓台感好好。
5/ Sica同ROVER夾band嗰段係全晚其中一個高潮。Sica喺香港幾乎係獨一無二嘅藝人，放喺呢個團隊，又異常融合。而我發現現場嘅fans有男有女，有後生仔有成年人，係我睇過Makervillle搞嘅show fans多樣性最廣泛嘅一次。
P1X3L又好，5G又好，都有一種溫度，嗰種溫度，就係大家當初睇《全民造星》感受到嘅窩心、熱血。
