由於新工作講求創意，上月吃團年飯時，我叮嚀同事們：「記得check check 枱頭原子筆有墨，否則新正頭返工，開筆寫不出色就大吉利是，最緊要寫得『出色』。」創作人多數用電腦打稿了，偶發思古之幽情，這是中學同學李丞責教我的，雖然八卦迷信，總算溫馨提示。
座中一位理科人笑說：「Programmer剛剛相反，枱頭習慣冇筆──冇bug呀！」又是食字gag。世界轉得快，我們眼中的新興行業如程式設計，也累積出自身一套八卦迷信、一套文化傳統了。
世界的確轉得快，早前去教賽馬會記者訓練班，方健儀講變身網紅心得，我講人物專訪寫作技巧，同日上午，還有電競評述員課程呢！你以為打機要受專門訓練已夠新奇？連談論打機也得要學才算新奇呀。無論你是否接受，且看英超，球員球衣有贊助商廣告很正常，球證衫上卻照樣印着EA Sports──以FIFA遊戲馳名的電子產品公司。咁即係點？足球本來是人性化、講究肢體技能的共通語言，如今隱含着digital、VR才是其最高裁判和主宰的寓意。將來，我們會寧願約齊廿二個朋友聯線打FIFA比實牙實齒落場踢更好玩？睇人打機比睇真英超更有趣？還是，已經係咁？
先別草草貪新忘舊或喜舊怕新，恭逢世變，吾輩由小時候尚要寫毛筆，到冇bug，有生之年趕得上香港打入世界盃(VR大有可能)，新舊交替千頭萬緒，何妨擴闊胸懷大開眼界？
是為序。