採用現代主義「包浩斯」建築風格之嘉頓中心，至今仍為深水埗的地標。
嘉頓山，青山道，九龍道，香港味。燒味、鹵味、魚蛋、碗仔翅；雞蛋仔、煎釀三寶外，重有忌廉檳、時時食同朱古力手指，一份跟香港人密不可分嘅「嘉頓味道」。
首代嘉頓中心於1935年落成，現時之第二代亦快將重建。
一個晴空萬里嘅日子，香港兵頭花園(香港動植物公園)鳥語花香，兩個熱血青年張子芳及其表哥黃華岳，坐在一隅長凳商討一件將會改寫一生嘅事，正因為喺公園做呢個決定，公司成立註冊名稱就叫「Garden」，時為1926年11月。
一個理念，兩代建築
1935年嘉頓中心落成，當時還未有設置鐘樓，已經係深水埗最高嘅地標建築；早期廠房以生產餅乾為主，戰爭時期經歷破壞，戰後成為政府供應商，專為三軍提供麵包餅乾。後因五十年代「雙十暴動」，廠房受損需要重建，嘉頓委託當年著名華人建築師朱彬，為新嘉頓重新設計，更藉此將品牌重新定義形象。擴建後中心增至七層，採用現代主義「包浩斯」建築風格，以實用及簡單原則。雖然受來往啟德機場航道高度限制，但仍可加上鐘樓，使嘉頓中心成為極具代表性的香港歴史建築物之一。
昔日通州街附近乃為維港大海，設有深水埗碼頭往返港島中區，嘉頓中心位處青山道高點，而其紅白色組合外牆嘅鐘樓，曾經為不少掌握時間乘搭渡輪嘅市民提供方便。及後黃金戲院一帶附近發展熱閙，地攤小販及各式高、中、低檔消費場所食肆一應俱全，為普羅市民嘅最佳娛樂消遣集中地，而返各區嘅紅Van「青山道」路線，乘客都會講過「唔該嘉頓有落！」；不單石硤尾或深水埗市民，食飯好、下班好、行街好、睇戲好、宵夜好，大部分人都會約定「嘉頓有落」，正正反映嘉頓中心曾經與社區連繫之角色，市民大眾心底之重要地標。
一個記憶，兩份味道
雖然深水埗石硤尾早年係草根社區，當時要去嘉頓餐廳飲十幾蚊杯咖啡已經係「高消費」享受；由早期經營廠房到酒樓，到後來轉營飲咖啡又有法國蝸牛食嘅西餐廳；昔日餐廳已由地下正門路旁大玻璃位置，搬上二樓繼續經營，騰出地下作零售，及歷史時間廊讓市民回顧之用。
回憶其實各有不同，是否視為集體又真係因人而異，對於深水埗嘅老街坊，合共超過八十年歴史嘅嘉頓中心，或許嗰份回憶，未必會因為重建而被磨滅。但一個社區，因為經濟效益而失去一個歴史標記，又會否令整個社區得不償失，失去人情味更失去值得細味嘅情懷光彩。或許在面對好幾十年寸金尺土嘅壓力之下，至今依舊屹立喺鬧市嘅嘉頓中心，嘉頓所製造嘅生命麵包、雪芳蛋糕、威化餅同梳打餅等呢份香港味道，已經超越雙倍維他命。
嘉頓中心設有西餐廳、零售及時間廊。