一場意外大火，火勢由白田村，燒至窩仔村及大埔村，當中所焚燒嘅山邊寮屋，令5萬8千多人一夜無家可歸；呢一年聖誕，係1953年。
公共屋邨歷史始於早期「徙置區」，石硤尾邨嘅開始就係因為呢場火災，一個當年人性化嘅應變政策，促使第一代「公屋」嘅誕生。石硤尾邨嘅平面設計有如英文H字型，為可容納四至五人嘅120平方呎斗室；環迴走廊圍繞各層單位，前後之間只有一牆背對之隔；為通風原故，對外牆頂留有數個方形通風口，幾乎沒有私隱可言。在H中間之公共洗濯平台，設有兩個水龍頭提供食水，另廁所及沐浴間都係置外公用；每層84戶入住至少逾300名居民，穿梭只有男女各6個廁格及7個沖涼空間；繁忙時間無論打水放水，分分鐘都要大排長龍；而煮食只可以喺門口旁走廊位置，架上簡單明火煮具，晚飯時間全世界一齊門口煮飯何其熱鬧。每日傍晚開飯，更總有幾個阿媽企喺屋企門口，嗌落街叫射緊波子嘅阿仔返屋企食飯！
五湖四海，有情歲月
昔日屋邨治安差劣，流氓地痞「劈友」打鬥時時皆見，但街頭街尾也是星羅棋布，賣著各樣南北小食嘅街邊走鬼檔。這些小檔主，不少本身就是徙置居民，一個挑籃一架木頭車仔，如此養活一家一代人。
登上今天石硤尾邨41座之美荷樓，窺看今天不再海岸之深水埗；時移世易昔日本作寄居從南下逃難避亂到此之過客，在一片澄藍自由天空之下，選擇以香港這個暫借地方為家；今天美荷樓在活化計劃中主要用作青年旅舍，共設為129個供多人、家庭或雙人等不同房間，丁點有如昔日過客暫住味道。
五彩斑斕，有本有源
重新粉飾嘅美荷樓，仍舊留有不少當年簡約設計美感；橫線直條方街磚，縱橫交錯，一切像街頭藝術的牆身壁畫，展現香港地嘅文化風，貫穿樓層階梯大堂。如果要瞭解六十年代居民生活，這𥚃增設「生活館」，保留或復刻了不少當年家居陳設，讓參觀者可以有親身感受；在現代建築嘅浮誇風氣下，美荷樓仍保持的原有結構與身段，絕對比美從美荷樓後山，俯瞰的一道西九龍日暮西斜風景線。
被評列為二級歷史保護建築，唔等於美荷樓嘅價值只屬二級，其所代表嘅係一個札札實實嘅年代，一代貼地嘅基層精神，政府切入點正係當年市民民生最基本需要，設施只為滿足一個單純需求，以助市民水深火熱，安居樂業。本因一場大火，揭開香港安居新一頁，毫無盛世超支延期，化咒詛為祝福，對得「住」當代。
港人由木屋公屋蝸居掙扎過來，今天卻回歸蝸居甚至蟻居……
因為一場大火，揭開香港安居新一頁……
同是天涯淪落人，守望相助至為重要……
悠悠歲月幾多掙扎及勵志故事，不少受惠於當年嘅公屋政策之下萌芽。