當豬肉佬仍記得夢想成為偉大舞蹈家……凡事做到極致就係藝術……咁「庖丁解牛」嘅Nusret Gökçe(Salt Bae)，係專業「肉類分割技術員」定係藝術家？
講開本地當代藝術，就要認識牛棚，歷史要由油街開始追溯。諧音「油街實現」之北角油街12號，屬二級歴史建築之香港皇家遊艇會前身，為藝術家和文化人之藝術村。由於千禧年間，有消息指或會被改建為郵輪碼頭，藝術村逼遷覓地籌謀之際，翌年發現於一海之隔，前身為牲畜檢疫站及中央屠宰中心之土瓜灣馬頭角道牛棚，正好於1999年停止運作，正值空置。
於是2001年，本土藝術家及團體開始進駐，由2003年舉辦《牛棚藝術節》、2004年《牛棚書展》、及近年之《Art Central巴塞爾藝術展香港展》，都得到各界認同及好評。風風雨雨爭議不斷，鍥而不捨艱苦經營，直到今天已經有多個包括來自油街嘅藝術團體，於牛棚繼續發展創意，當中分別有視覺藝術、錄像藝術、陶瓷、塗鴉等範疇，而牛棚亦改變成為「牛棚藝術村」(Cattle Depot Artists Village)，獲得市民公認。
簡樸之風，實而不華
牛棚以紅磚為主要結構材料，1908年開始運作嘅牛棚建築群設計布局，皆以二十世紀西方市場格局為藍本；中庭以矮牆圍起分隔，矮牆兩面牆腳均有長長餵飼水槽，亦可見昔日用以繫於牛隻嘅鐵環。圍繞中庭有五座紅磚平房，錯落有致各50米長，當中亦保留牛隻上落斜道。各磚屋皆有特色，通花鐵欄裝飾襯木門窗戶，天花木橫樑，所有磚屋用作支撐的鐵柱橫樑，全部塗上黑色，與紅色泥磚及綠油油植物樹木成強烈對比，以磚砌原裝煙囪更是絕無僅有，充滿藝術氣息，係香港碩果僅存同類建築群。
牛棚嘅價值，不止於硬件上其本身歷史意義或建築特色，牛棚藝術村嘅存在，除可以軟件上推動藝術發展，更可以承擔社區文化發展及保育任務。同樣是標籤創意藝術，這𥚃一切都實而不華，以人情味為根本嘅土瓜灣十三街區，跟中環其他以創意吸客嘅保育建築群，理念似乎接近，不過流露氣息則大不相同。牛棚一切都以本土為本，具地氣又有heart，冇賣弄花巧商品銷售，冇Cafe可以坐低享受高檔西洋咖啡馬卡龍。而天價花巧嘅擺設品、大型品牌活動、卡通人物載歌載舞都通通欠奉，只有樹影婆娑之下難得嘅寧靜，思考及享受人生另一套生活價值，融入地區氣氛。
同舟之下，合而不假
牛棚係一個簡單嘅藝術世界，攀牆樹繼續圍繞紅磚瓦頂自由蔓延，貓兒可以打橫瞓喺街道享受太陽。自然、率性、自我，正係牛棚村嘅風格，藝術嘅空氣如此簡單，徒步接觸入門不用登梯。其實，藝術就是一份生活態度的選擇，融合於社區。
保留香港社區藝術，並非簡單提供創作空間，更需要環境與及氣氛。必須承認，香港嘅藝術創作是由殖民地華洋文化作為起點，豬肉佬與舞蹈家都係同一屋簷下，共融下創見不同生活風格，建構出小島嘅傳奇歷史。
