曾幾何時，大廈未至摩天，眼望直線，天空就在眼簾。昔日住宅未有升降𨋢，高度限於雙腳登梯。不論三層、四層、五層，隨著樓底下降，盡見「唐樓」設計與演變。
唐樓英文Shop house或Tenement house，名字分別嚟自其本身「上居下舖」，或係類似今日劏房嘅「一屋多戶」情況；但其實隨時代變遷，廣東話音譯嘅「Tong Lau」，已經普遍成為三至五層房屋使用嘅英文名詞。而至今仍暫存為數不多具歷史嘅市區唐樓，礙於業權分散，能被受保護評為一級歴史建築嘅比例卻為甚少。當中外貌形狀主要都係「直角轉角」，另外再較少嘅「弧形轉角」則現存僅剩11幢。
居形於上，舖形於下
1931年荔枝角道與塘尾道交界，一幢四層高意大利式古典大宅落成，大宅主人為九龍巴士主要創辦人雷亮家族，建築設計師則為W.H.Bourne；「雷雨功深揚灑露，生民仰望藥回春」，一幅對聯結構出「雷生春」大宅名字。
因雷亮嘅台山同鄉兄弟雷瑞德(亦是九巴創辦人之一)為中醫師，故大宅早期地下及一樓為中醫館及藥店；「雷生春」名字字義中具意境，顧名思義，自然有妙手回春意思。據說當年藥店銷售嘅自家品牌「八寶跌打刀傷藥露」，廣受市民歡迎並行銷海外；縱然上居下舖嘅雷生春以大宅建築嘅高雅身段，位置總跟所處社區有點格格不入，恍如卡馬龍配生煎包，不過當時旺角、大角嘴及深水埗一帶，附近街坊人所皆知。可惜雷氏於1942年逝世，數年後藥店亦隨之結束，其後改作商住用途出租。而六十年代開始，雷氏後人亦陸續遷出，到八十年代後逐漸荒廢，後期九十至千禧年代，大宅曾傳出無數子虛烏有嘅鬧鬼故事，盡失本有之親民及高雅嘅味道。
雷生春於1931年建成，並於2000年被列為一級歷史建築。
「雷雨功深揚灑露，生民仰望藥回春」，一幅對聯結構出「雷生春」大宅名字。
保形於外，活形於內
大宅雖然飽歷滄桑，內裡卻藏著不少值得保留及欣賞嘅建築特色。如已經絕跡於市區「弧形轉角設計」嘅「走馬騎樓」之外，其糅合歐洲古典結構美學、Art deco現代藝術裝飾元素，並兼顧唐樓實用主義，絕無浪費空間；騎樓不單只可作乘涼，還可以為住宅遮風擋雨，更可提供街坊人流有瓦遮頭，皆因其設計特色就係層層有露台。加上大宅四層嘅高度，相比今天毗鄰大廈幾乎已等於八層樓設計嘅透風空間，「通氣」亦係通情達理。
活化得宜，惠澤人群
千禧年雷氏後人將大宅捐贈政府，並隨即被評為歴史建築，浸會大學於2012年開出「靈丹妙藥」將其「活化」投入服務；經過修茸工程，繼承雷氏家族早期脈絡初衷，雷生春「回春」成為中醫藥保健中心重投社區。在提倡保育精神之下，與街坊之間建立新嘅結連，將社區重新注入生命力；除每日提供義診服務，亦培植中草藥物及地下之涼茶舖，叫保育能夠回復本來建築之功用，繼續雷雨灑露惠澤社群。
「走馬騎樓」因為騎樓大到可以騎住隻馬行走，雷生春騎樓之大可謂「走馬大騎樓」。
大宅於2012年成為中醫藥保健中心重投社區，繼承雷氏家族早期脈絡初衷。