一講到布拉格，就係覺得人多同熱鬧。不過講到人患，點都唔夠香港多。接近800萬市民，再加多全年4,000幾萬遊客，除番12個月，平均每個月都成1,200萬人，搞到如此生活緊張，簡直遠離最初的城市規劃。
宗教，有政治變化
唔講唔知，原來由近代的工業革命到第二次世界大戰之前，布拉格位屬歐洲之工業發達城市。原來Praha曾經一直係多族雜居，有如香港回歸之前般多元文化互尊共融。承接上回講過於1345至78年在查理四世(Karel IV.)統治時期，布拉格就最為鼎盛。而於1355年，因為佢成為神聖羅馬帝國皇帝，愛屋及烏之下布拉格即刻升格為帝國京城。
其實於查理四世仲係王儲的1344年，為咗削弱當時捷克貴族的勢力，佢借助提高教會地位去加強王權。於是鼓勵教皇克勉六世(Clemens PP. VI)建立布拉格大主教區，並且下令於本來古舊之教堂原址上興建一座更加顯赫嘅教堂。而呢間就係哥德式教堂鼻祖的「聖維特主教座堂」(捷克語：Katedrála svatého Víta)。
建設，有時代風雅
座堂的興建因著幾位建築師先後過身，冇銀以及戰爭而未能一氣呵成。直至到1929年，接近成600年的時間，才叫做終於完工。亦因為咁，會發現到教堂有好幾個與別不同特色，例如網狀拱頂、外牆的雕塑、「金門」等等之豐富，在此只好下刪十萬字。而貴為中歐地區第一座大教堂，亦因為咁而令彩繪玻璃花窗和哥德式風格發揚光大，影響唔少之後的教堂設計。
唔單止咁，查理四世並且興建咗唔少教堂。亦係老城的旁邊建立新城、查理大橋、查理大學等等。講開大學，就要提下喺舊城廣場嘅天文鐘了，佢由鐘錶師傅Mikuláš of Kadaň和大學之數學和天文學教授Jan Šindel製作。
天文鐘的主要部分包括有機械的天象儀鐘面、人偶與12使徒活動雕塑和月曆盤。不過，因為復雜之故，大鐘曾經多次停止和失修，至戰後1948年才再次行番。所以現在每逢整點所作的報時鐘聲，都充滿歷史味道。
浪漫，有血淚代價
當然布拉格的瓦茨拉夫廣場、老城廣場、萊特納公園、哈維爾市集、城堡區及火藥塔等，都係值得遊覽的景點。不過講到歷史，其實兩次世界大戰之後，1948年共產黨執政、1968年布拉格之春的鎮壓，以及1989年柏林圍牆倒下後的天鵝絨革命，再到1993年布拉格成為獨立的捷克共和國的首都，布拉格並非古時咁浪漫。
返番1378年11月29日，查理四世因中風，喺佢建立的布拉格離世，這個由佢用心規劃的城市，於2013年入選為世界首座「世界文化遺產」城市，又再浪漫番。
