每次認識新朋友，知道我曾經喺瑞典居住，都會異口同聲反問一句：「北歐喎，咁咪好凍囉？」的確係幾凍㗎！雖然喺瑞典我宅喺屋企，就算出去都係點對點。不過適逢香港冬天，今日就同大家分享下我喺瑞典學到嘅禦寒術。
第一，多層穿着。想要保暖，其實唔一味在於個厚字，而係要着得夠多層。一嚟熱力冇咁容易揮發，二嚟入到室內有暖氣嘅地方就唔怕會除唔到、熱到出晒汗。
第二，打好個底。最貼身嗰層其實係最重要。坊間有唔少用咗特別質料造成嘅打底衣物，又薄又保暖，例如底衫、legging，仲有埋襪𠻹。層底打得好，凍極都有個譜，咁就唔使着到成隻粽咁。買嘅時候記得揀啱size呀，夠貼身先有效㗎。
第三，冷帽耳罩唔少得。雖然我個人一向都冇戴帽嘅習慣，因為唔鍾意啲頭髮夾到扁晒。但係禦寒嘅角度嚟講，頭部嘅保暖係非常重要。人體有好大部分嘅熱能其實係經由頭部流失。如果你好似我咁，唔太喜歡戴帽的話，戴個耳罩都會感到暖和好多。
第四，厚底鞋。厚底鞋除咗可以令人望落高啲，身形比例更加好之外，仲可以幫我地隔走地面嘅低溫，防止熱力透過腳底流失，尤其係喺落雪嘅地方。不過厚還厚，記得揀有防滑功能嘅鞋底，小心唔好跣親呀！
以上就係我小小嘅禦寒穿着心得，以後冬天關心朋友時，唔止要提佢着多件衫，仲要記得提埋佢穿着要有技巧。不過講到尾，個人最鍾意嘅禦寒方法都係攬住心愛嘅貓咪。
唔知你嘅禦寒心得又係啲咩呢？
