邁阿密之亂

呢單嘢我真係R晒頭，似乎會R到死嗰日，所以忍唔住都想紀錄下自己嘅疑惑。究竟Inter Miami點解喺香港會咁樣？

(1)我唔係問Messi點解會咁樣，我係問Inter Miami。唔係只係講Messi，係連Suarez都一樣，星期日話傷到出唔到場，但去到東京踢70幾分鐘，仲倒掛添；隊波去到東京，正選已經有3個巴塞前球員，但喺香港呢，上半場就一個都冇。大家只係針對美斯，但可能係因為我悲觀，我睇到由內到外Inter Miami嘅表現。唔係一個美斯出事，係成隊波(或者教練？)都有嘢。

(2)如果係成隊球隊想玩對抗，Beckham作為班主，又點解咁識做，咁努力嘗試拎返少少分，比賽後俾人噓住都繞場一周揮手耍冧？唔通Beckham同成隊波(或者教練？)係不一致嘅(我自己覺得又唔會不和吖？)？

(3)有人話，俾唔夠錢咪唔踢囉。但根據估算，佢哋去到日本收到嘅酬勞，應該唔會多過今次香港，點解去到又踢得咁落力？係咪唔關錢事？

(4)有人話，係因為Inter Miami唔喜歡政府要佢哋太多政治宣傳？咁佢哋最後乜都冇做喎，而唔係苦住口面被迫做完。而家嬲喎，我估只要最後佢哋求其出場踢返30分鐘，大家就滿意收貨，點會為「冇成功被迫做過嘅事」而嬲到咁？真係會？

(5)又假設唔知邊個得罪咗佢哋，美斯唔踢，點解都唔肯出嚟拎支咪，跟稿讀都好，講下點解唔踢得，hea住say個sorry，笑下揮下手，大家都冇嬲到咁吖？

(6)假設Messi真係傷？(真係有人信佢同Suarez傷到踢唔到？)去返(5)，真係傷都可以公開對4萬球迷笑下揮下手，扮嘢耍個冧呀嘛？球王其實好怕醜？都唔使佢做咩呀，我又唔覺得佢做唔到以上嘅嘢喎。

(7)全部都諗唔通，大家就會一句「係呀，就係唔俾面香港呀，吹咩？」如果咁樣就唔使討論了，呢個係萬能答案嚟。但美斯去到日本又懶係好似解釋返點解唔出場，又話好想下次再嚟踢過，點解呢？點解喺香港時唔講，去到日本先講呢？又話佢怕醜，唔識同唔會搞PR嘅？我真係……R晒頭。美斯話係「不幸」，我就覺得「不解」多啲。