新聞
2017-10-27 06:00:00

青年上位

分享:

我地唔可能質疑依家好打得呢位當家的誠意,至少係響招攬青年入去政府方面,係有做嘢嘅。

老老實實,有時青年學生會問,有乜方法可以政治上大展拳腳,一般我都會叫佢唔好咁大想頭。你睇下依家新西蘭總理先至37歲。按此年紀,只要好打得早婚,可以做佢個女,咁做張司長個女都仲可以。即係話,我地香江的政治發展及更新步伐,同其他各國足足脫節咗一個世代。

但如果有青年真係想上位,但又唔想畀人又紅又專嘅feel,去建制政黨由低做起去做議員,我會叫佢去先浸個海外碩士,再返香港參與嗰啲所謂「智庫」的工作,搞公共政策之倡議。只要個樣子執得好差少(洗下牙,唔好食煙睇人睇到)同埋夠勤力,又唔搞啲好政治敏感之研究,拿本好打得政綱翻幾翻,讀一讀,響「智庫」整個職位寫個報告,開吓記者會,跟住淺紅或淺藍之商家佬(記住唔好去泛民、千祈、拜託)講啲政府啱聽之政策,講下大數據呀,start-up呀,entrepreneurship呀,自然會有人垂青,跟手又可以搞個基金會推動一下乜嘢冷門運動之類,整個正能量的樣子及打扮,咪可以響media搶版面,等政府出手招你入去諮詢組織了。

呢個係政治現實。香江青年上位難,唔少青年會怪責「老海鮮」頂住個位唔放。你估「老海鮮」唔想退咩?有人接班,佢地巴不得交棒,然後退休四圍走舒服下半世,但奈何香江樓價等樣樣貴,依家咁早退休,都冇辦法盡埋最終極之義務:就係幫仔女畀首期上車。喂,單係半球一球做首期上到車,都驚青年供供吓頂唔順,於是做「老海鮮」嘅,就梗係無咁快退落來啦。

「老海鮮」好多連WhatsApp打字都有困難,但佢地到咗退休年齡都唔走,唔係唔想走,係唔走得,驚自己個仔女無得上車及上位。如此情況,老海鮮要證明自己之超卓搵食能力,最好方法就係不斷唱衰狂鬧下一代係廢中或廢青。如果唔鬧下一代或下下一代冇用,又點樣可以連WhatsApp都唔知點update之老海鮮,繼續霸住個位唔走呢?

政府又何嘗唔係?政府真係廣開言路,最快係從自身開始,即係局長願意親自走去青年之AO或EO,捉佢地飲杯茶,自然就會聽到佢地之聲音。政府自身裡面已經封閉,又點期望佢地會聽外面之意見呢?

所以,想上位之青年,只要唔介意佢地之意見到頭來都係冇乜用,不妨去借好打得之東風,依家趁勢做多啲務虛嘅乜嘢政策倡議,隨時有機會接近權力核心,而且假如獲得上層(北京或西環啦)認可,更可以扶搖直上啦!隨時離開政府後,自己開檔「智庫」,響強國大學讀個碩士,同港澳政策人士埋堆,咁就更上一層樓,買車買樓,唔使靠父幹啦!

隱私權保護政策
請細閱並示意接受以下私隱政策及免責聲明,按下「接受」表示你已同意並願意接受 am730 網站內之私隱政策及免責聲明。了解更多
接受