Omakase到底發生過什麼事

回顧2022，廚師發辦到底發生過什麼事？受疫情拖累之下，飲食業過得一啲都唔容易，其中能夠突圍而出，除咗兩餸飯有條長長人龍之外，Omakase壽司店亦有一條隱藏人龍waiting list。呢幾年大家都去唔到日本，香港江戶前壽司店，無論係日本過江龍還是香港地頭蟲，好多都預約困難一位難求，動輒要等兩三個月。香港人為了滿足口腹之慾，不惜腰間錢，只要看看IG某些foodie，一星期吃兩三餐是等閒事，食力與財力同樣驚人。因為太好賺，Omakase就如雨後春筍般大量湧現，粗略估算一間高級鮨店，座位十個，午市約千五蚊一位，晚市約三千，每個時段做一輪客，每日收入四萬五，一個月百多萬，一年營業額輕易過千萬。

師承自Saito San的Kubota San，醋飯握功空氣感十足。(wilson fok攝)

而Omakase特點係食材成本控制，師傅俾乜你就食乜，容易計數，所以近年好多年輕本地師傅彈出，有啲喺某高級鮨店待上一兩年，就搵投資者自立門戶，然後再吹噓師承自這個那個，一副大師傅自居，再找公關公司，搵來一大班垃圾KOL及Facebook什麼關注組瘋狂唱好，營造一副好受食客歡迎的樣子。其實功力未到家，魚料刀功差醋飯鬆散，溫度唔啱，被食客網上鬧兩句就話人抹黑，長此下去成個行業俾你搞彎晒。

鮨齋藤到底發生過什麼事

香港壽司界天花板之一，曾經係東京米芝連三星Sushi Saito(鮨齋藤)，喺2022年十一月投下一顆震撼彈，發出一份全球聲明，詳細列明Sushi Saito旗下所有店舖，全部在Sushi Saito修畢技藝並且受到齋藤孝司認可的職人，防止有人利用其名字作招徠。畢竟日本人對自家名聲極為珍惜，據我了解明顯係針對香港市場，以Sushi Saito香港店為例，魚料全部由日本負責，Saito San至今仲係日日去漁巿場吹水，建立一間成功鮨店並非一朝一夕。
香港人還是死性不改，邊樣易賺錢就一窩蜂，走捷徑，以前拍電影如是，今日壽司店亦如是，冇得救。