過時過節，最重要可以和家人好友們共聚。香港隔離政策放寬後，不少香港朋友都趁聖誕長假飛去不同地方唞唞氣又或者探望親朋，上星期就有家人飛來英國，與關餅氏共度聖誕，還會過埋除夕元旦才返香港。有家人從遠方來，在寒冬下感到特別溫暖，那當然要帶他們食好西，聖誕節一定要食聖誕大餐才夠應節！
在英國有不少意大利餐廳，質素不錯而且價錢合理，去年在曼城一個小區幫襯過一間走親民路線的意大利餐廳，這裏的聖誕大餐非常超值，今年決定帶埋家人與成班好友再去大擦一餐。間餐廳叫Mulino，位於Urmston的town center ，由曼城巿中心揸車大約20分鐘車程，亦可以坐巴士，車程約35分鐘便到。
Mulino餐廳推出的Christmas Party Menu有三個course，前菜及主菜各有6款選擇，甜品則有4款可選，我點了蘆筍豌豆湯配香脆麵包片、香煎三文魚配白酒煮青口及蝦、Tiramisu；而同行家人則點了精選芝士配Salami、熟成21日西冷牛扒，甜品則點泡芙Profiteroles，三個course的分量不小，就連甜品都大大件，最正是每兩位就有一支House Wine，全是意大利酒，由於我們都不是飲得之人，難即晚隊晒一支，惟有take away回家慢慢歎啦！
Christmas Party Menu有兩個價錢，星期日至四每位£24.95；星期五、六每位£29.95，而且不收額外服務費，餐廳職員服務個個都好nice，滿臉笑容。當晚大家都食得好開心好滿意，個個豎起手指公讚好，不斷話超值抵食，已諗定出年聖誕會再來幫襯咁話。