港人恩物│高質刺身丼 值得山長水遠去幫襯

早兩日陪朋友去位於牛律的Bicester Village Outlet，他要急買LC鑄鐵鍋和旅行大喼，又等不切Amazon的Black Friday大減價，所以就由倫敦揸兩個鐘頭車前往。筆者去Bicester Village只有一個目的，就是要去漁匠屋食刺身丼！漁匠屋是屯門一家主攻壽司、刺身丼的人氣店，今年一月在英國開設外賣店，火速便在面書群組紅爆，個個食完有讚無彈，哼～今次終於輪到我喇！

漁匠屋中午12點才開門，筆者食飯前先和朋友在Bicester Village逛逛。好友一早提我不要和日本的outlet相比，Bicester地方不大，主要做遊客生意，好多大牌的特價都不算吸引，像朋友的LC鑄鐵鍋只有七五折，如非趕住用就等下啦。而我只心繫刺身丼，一到12點即行過去，漁匠屋就在outlet過兩條街的Village Super內。一進去，看似黃埔AEON的超級迷你版；左邊是有很多香港食品售賣的港式超市，右邊是數間由港人開設的外賣counter，其中一間就是人氣十足的漁匠屋。離遠已見到好多熟悉的港人面孔，據稱不少客人特登揸兩三個鐘車來幫襯，有的來自Leeds或Sutton，大家都只為了回味以前在香港食到的味道。

漁匠屋有刺身、稻荷壽司和招牌刺身丼選擇，由於不設堂食，有些客人買回家食，有些在車內食一轉，然後再柯打，而我和朋友就選擇立食。山長水遠來到，當然要柯打最貴的「壱の重丼」(£29.5)，付款後就等叫號碼。約15分鐘後，我的刺身丼終於到手！由牡丹蝦、帆立貝、拖羅、油甘至吞拿魚都充滿光澤，店員還細心提示壽司飯混了赤醋，不用加豉油食。果然，刺身很新鮮，牡丹蝦鮮甜，帶子肥美，拖羅甘香入口即融，壽司飯和醋的比例剛好，一邊食一邊激動又感動，真的山長水遠來立食都值得！食完不夠喉，另一邊廂還有港式菠蘿包、生炸雞髀、雞蛋仔售賣，筆者推介咖喱魚蛋，味道和質感都不錯。食飽後可到超市逛逛，由永樂蝦子麵、龍眼，至港產白蘭樹下手工氈酒都有，選貨都幾揀手。

英國漁匠屋 地址：Unit D, Bicester Shopping Park, Kelso Road, Bicester OX26 1ES, OX26 1ES
查詢：https://www.facebook.com/gyoshoyauk/