新冠肺炎疫情席捲歐洲，足球呢項世界大產業自不能倖免，4月初各地聯賽能否復賽已變得愈加不可能；6月歐國盃本來玩大到12個國家主辦，估計推遲一年舉行嘅機會唔細，現時談論焦點係，呢季各地聯賽究竟係void(作廢)定finish(完成)。英超運作咗接近30年，其他各地頂級聯賽大膽講，跟極都係掹車邊；面對史上最大嘅產業危機，呢廿間球會當然唔會坐以待斃，無論本周開會作出任何決定，對各地頂級聯賽會起指標作用，當然唔好期望會有英國首相約翰遜咁獨特嘅「佛系」任由群眾中招，然後可以免疫咁出位嘅想法。
據報由20間球會組成嘅英超聯賽會，即有20票投票權，要有七成或以上嘅票數方可通過任何決定，每年失望嘅球會多，void咗佢下季再來嘅一定佔多數；當中戰績持續走低、前線尖兵養緊傷嘅熱刺，連領隊阿迪達都「中招」嘅阿仙奴，同3間分數上喺降班區嘅球會一定舉腳贊成。另一方嘅領頭羊利物浦當然同意當提早完成，咁就即可一嘗史上首度英超封王嘅心願，但睇怕同路人唔多。