季內最後一個國際賽期，主打係世盃外歐洲區附加賽，單計要參加呢場生死戰嘅世界排名最高4支球隊，意、丹、土及烏克蘭，暫時最新入選嘅英超兵大約只得11人。除咗意大利嘅門將當拿隆馬同守將卡拉費奧利級數較高，所屬大會期望二人踢足兩場硬仗後仍能平安回歸，唔好影響季尾爭標搏殺外，其餘屬呢類嘅英超國腳大可盡情為國賣命。
畢竟世盃四年一度，2018年靠附加賽上到決賽周尾班車嘅克羅地亞，最後殺入決賽負法國；上屆嘅葡萄牙贏附加賽，最後入到世盃8強，有份亮相足球大舞台嘅國腳，身價有望提升來屆博轉飯鑊。
相反歐洲列強呢期主打友賽，球星大可趁機回氣曬下太陽。世盃決賽周逼近，各隊主力陣容已成型，剩番幾場友賽意義唔會太大。好似英格蘭今次選夠35人分兩team打兩場，杜曹揀緊一啲邊緣人做世盃後備兵，勝負唔太重要；但一眾英超倫敦名牌球隊3月失敗作小結，阿仙奴4冠夢碎、車路士4連敗同熱刺排緊英超尾4，就要好好趁呢個多星期療傷，下月回來場場生死戰！
ADVERTISEMENT
邀請你率先參加屈臣氏集團「185周年歷史館」讀者導賞團
