麥巴比下站

皇馬貴為歐洲頂級大球會連續兩季幾大皆空，已係一次大災難。暫代主帥坐正無望變紙老虎，隊內嗰種鬱悶湧晒出嚟，火爆嘅內訌打返場MMA，有啲智慧嘅季尾hea踢當回氣等世盃。麥巴比最笨，風頭火勢借傷同女友請假去地中海曬太陽，俾狗仔隊影到，搞到幾千萬人網上聯署要求皇馬踢走佢，呢次印象分扣晒。教頭易炒，天皇級球員有份肥約難送走，高層嫌老帥安察諾堤過時只攻唔守、主力又唔鐘意接班嘅少帥沙比阿朗素乜都講規矩，造反得手，來屆大熱接手嘅63歲摩連奴，仲有乜新招再做「特別的人」？只怕皇馬國內繼續鬥唔過紀律嚴明嘅巴塞，更難望喺歐聯重振雄風。

27歲嘅麥巴比，呢兩季喺皇馬上陣100場入咗85球但無緣捧走大賽獎盃。要留意呢兩屆西甲佢只係交出3次同4次助攻，做慣大哥獨攬功勞，但皇馬山頭主義大哥多的是。以佢基本60萬英鎊人工，下站最有機會加盟英超列強打單箭頭；又睇下曬完太陽去到世盃打真軍，可唔可以真正以隊長身份領法國封王，證明係真球王接班人，推高身價。