佣金之王

英超20隊上季25/26年球季嘅經理人佣金，高達4.6億英鎊，對比前季再升約12%；佣金唔單止計旗下球員過檔嘅轉會費抽佣，有啲球會會支付佣金畀經理人求售球員，以及包括球員續約新合同。車路士連續兩屆係「佣金之王」，上季俾咗6,500萬英鎊，而曼城連續兩屆佔三甲一席。4.6億英鎊係乜嘢概念？就係五大聯賽中嘅法甲，同季18隊波總轉會費嘅73%。如今一單涉及英超球員嘅普通交易，動輒三數千萬英鎊係閒事，啱啱有車仔踢過2次英格蘭大國腳嘅27歲中堅杜利奧查洛巴，轉會意軍科木要3,000萬英鎊，水漲係咪船高，踢過至知，但近年做到車仔生意嘅經理人最富貴係事實。既然球員進出，經理人可以謀取暴利，當然要有返一啲秘技先可以幫到呢班尊貴客戶同埋自己荷包，其中一個伎倆就係出口術，等大家喺社交媒體幫手抬轎。今夏暫時最出色應該係巴西球員雲尼斯奧斯祖利亞嘅agent，不斷放風話佢當事人會離開皇馬去阿仙奴，最終續約6年底薪扣稅高達30萬英鎊，可以繼續享受西班牙美食同怡人風景。