踏入季尾，成功要靠一鼓作氣、神一樣操作同「神」給予嘅運氣，唔容許有重大失誤；所以列斯聯近5場聯賽失20球後，焗炒「神人」領隊比爾沙，唔想落返「地獄」英冠。再向上望，「紅軍」利物浦用全隊最平人工、周薪6千鎊嘅二號龍基利靴，有運打低世冠盃盟主車路士，先攞英聯盃，四冠王過開頭關，喺「地獄」賽程到臨前，紅軍氣勢推上高峰，可能係今屆大成功嘅關鍵。英足盃同歐聯未來對手係未知數，利物浦今晚英足盃鬥忙護級嘅諾域治，同下周歐聯喺領先2球下再主場鬥國米，兩盃穩過關；連同英超跟曼城短兵相接，除非嗰兩盃都提早抽中曼城，以紅軍氣勢同前線有未續約嘅沙拿勁爆表現博加人工，今屆爭盃「坐3望4」。始終曼城最蝕章係無鋒陣，遇死守會有麻煩，今屆英超估計鬥到尾極精彩。4月10日榜首大戰曼城主場鬥利物浦，兩軍賽前最大攔路虎係連屈福特都打唔贏嘅曼聯；紅魔如果本月呢兩場波全敗做炮灰，分分鐘連第5嘅歐霸位都保唔住，叫球王C朗下屆打歐協聯？
