車仔最強11人

英超嘅生態有別其他頂級聯賽，中下游球隊都有足夠財力簽貴貨，富咸呢啲蚊型倫敦球會都可以踢出彩虹，聯賽自然好睇。所以利記可用4千多萬英鎊，簽到呢刻荷蘭最有天分嘅新星前鋒加普；但長期護級掙扎嘅列斯聯，都用到3,500萬英鎊，買入德甲嘅法國U21新星佐真尼奧魯達，大家都係歐洲新星，未踢過英超，購入似去賭場買大細，大家都係博一博。近年最「經典」應係係德甲踢到曉飛嘅「三獅」新星查頓辛祖，一年半前以7千多萬英鎊投紅魔，時任主帥係蘇斯克查；現時辛祖喺「坦克」Sir手下變成身、心都唔掂，一代「三獅」新星有機會變水貨。
 

新星非救星，要時間培育，適應英超節奏。車路士半季洗咗4億英鎊，呢個月轉作風狂掃入年輕人；睇過隊波有實力出場嘅主力現有30人，10件傷緊，單係前鋒有10個，排陣頭痕嘅波士樸達，今屆嘅命運可能喺下月歐聯16強鬥多蒙特定奪。球會仲有一位去年尾簽定嘅RB萊比錫法國新星前鋒尼干古今夏加盟，呢個最強11人，仲有冇機會喺倫敦見到樸達呢？