英超今屆賽程打到亂晒籠，阿仙奴、愛華頓同李斯特城啱啱先走過三分之二，比8支球隊打少3場，不過打得少未必代表往後唔失分。好似李斯特城，半放棄聯賽，全力向首屆歐協聯錦標進發，博個冠軍下屆打歐霸最實際；睇「狐狸」啱啱鬥阿仙奴收起邊啲主力就知羅渣士心意。各地中游球隊去到3月中，戰意通常開始散散地，李城外，白禮頓英超已5連敗，修咸頓亦3連敗，下一隊又例牌到「風流波專家」水晶宮？英超獎金高、競爭大，好少鬥hea，近期和波更極少出現。現時前4球隊近況弗到爆，對上6場聯賽錄得20勝3和1負，爭霸同爭前四咁激烈，季尾難有爆大冷賽果。再計現時最有機會降班嗰5隊，對上6場聯賽累計6勝2和22負，即係平均各隊近6場贏一場，有戰意但能力太差。英超以往「神奇」數字40分護級好穩陣，史上有5隊波36分都出生天，今屆睇走勢應該好大機會打破最低分留級紀錄。嗰隊係剛有射手班福特復出嘅列斯聯，定打少3場、但表現肉酸嘅「英超元老」愛華頓呢？
