阿歷斯山齊士踢完洲際國家盃後，至今仍然放緊假，未有隨阿仙奴出征澳洲嘅熱身之旅。「山神」近日接受訪問時講明要踢歐聯，又話同阿仙奴剩番一年合約，去向由球會決定，顯示呢位智利球星似有離隊之心。目前山神仍未續約，兵工廠為求留住佢，開出破球會紀錄嘅25萬英鎊周薪作為續約條件，但有指山神要求40萬鎊。講真，雲加向來慳家，又點會肯俾40萬鎊周薪佢呀！兵工廠早前以破球會轉會費紀錄4,600萬鎊收購拿卡錫迪，呢位法國射手喺季前熱身賽首仗披甲即有士哥，協助球隊以2比0擊敗FC悉尼，所以兵工廠球迷唔使太擔心，而且個人認為山神只係扭下計，希望續得一份好約，預料最終都會留隊。