美洲國家盃水準唔高，智利打叠兩年封王反而搞到鬥心減弱，不入去夏世盃決賽周；事隔3年冠軍陣容熟口熟面，多得「智利之寶」阿歷斯山齊士回勇，愛國家多過曼聯，入到四強。奇怪賽制只限八強淘汰賽，唔玩加時要即射12碼，結果4場有3戰踢成0比0，巴西過關，但實力分子嘅哥倫比亞同烏拉圭被踢出局；美斯要領阿根廷喺準決賽早遇主場巴西，呢關難過咯。
32歲嘅美斯，喺呢屆美洲國家盃應係佢破宿命攞大盃嘅最後機會；但失望係巴塞球王唔同「山神」，踢國際賽反而跌watt，今屆4場入得1球12碼兼0助攻，上仗球隊淘汰委內瑞拉如「半隱形」，照被教練力撐喺更衣室好有作用。巴西今屆4戰有兩場遇對方死守，先互交白卷；從兩軍對上9次碰頭，都係得一次打和可知，估計傳統宿敵阿根廷面子攸關，今場下風波都斷唔會死守博去到互射12碼。以主隊中前場較為平均嘅配搭同默契，一遇上較多空位嘅防守部署，恐怕「更衣室球王」要失望多一次。