有球迷認為新科歐國盃盟主意大利，喺世盃外附加賽出局，非常殘酷；其實歐洲板塊喺32支決賽周球隊已佔有13席，出咗線嘅10隊，除咗荷蘭，全部有份出席上屆決賽周，人強馬壯，俾啲足球新丁衝擊下唔係壞事。如可加入北馬、威爾斯、已入圍嘅北美加拿大，同差一步嘅非洲「新人類」剛果民主共和國同馬里，今年冬天呢個卡塔爾足球大派對更有新鮮感。想睇粒粒皆星，英超個個禮拜都有得喇。重返英超嘅C朗，距5度領葡軍入世盃決賽周只有一步之遙，佢個獎牌櫃亦只欠世盃冠軍一塊；不過呢位大哥上仗踢足全場，險勝土耳其後，同老牌教頭教頭費蘭度山度士，一齊被影到全程揦埋口面，可見唔使決戰鬥意大利都好憂心。畢竟今晚對手北馬正正打出國際賽最強戰術，無畏對手主攻，死守博突擊。葡軍出得返39歲嘅中堅「計時炸彈」比比，北馬出得返踢拿玻里小子艾利夫艾馬斯，佢曾經喺今屆意甲首循環開波5分鐘已一腳射死A米，呢鋪會唔會又盲拳打死老師傅，再成球壇佳話呢？
