Ｃ朗無寶不落，重返葡軍即主場捧盃，歐洲之王當之無愧；其球壇宿敵、從未以大國腳身份為阿根廷封王嘅美斯，必然恨得牙癢癢。始終美斯較C朗年輕兩歲多，並剛在巴塞隆拿奪歐洲金靴獎3連霸，史上首人，有心有力；重出江湖再為國家隊，喺嚟緊嘅美洲國家盃賣命，當然不希望再一次頭耷耷離場。美洲國家盃一別4年，南美新星唔算出好多，或者講一早畀歐洲大會撬晒，揠苗助長。計近5屆巴西只都兩度封王，阿根廷跟美斯一樣悲情，4奪亞軍；再睇今次12支參賽隊伍人腳，烏拉圭人腳老化，唯獨哥倫比亞新帥登場新氣象，最能搗亂大局。巴西佔地利，冇尼馬照係大熱，只嫌防線老化嚴重；阿根廷爭盃對手無多，又有球王壓陣贏級數，而且隊內有啲唔係好起眼嘅二線攻擊能手，可能更夾美斯攻堅。
如果C朗係激發美斯繼續為國奮鬥下去嘅原動力之一，咁比二人更年輕嘅「智利之寶」阿歷斯山齊士，更應該要透過呢個盃去證明自己唔係一條鹹魚。