紐卡素剛大炒錫菲聯。
各條戰線全面展開，英超八雄唔少即「露底」，白禮頓同維拉在歐戰首輪爆冷輸波、紐卡素喺米蘭市踢歐聯被圍揼，唔輸好彩，戴住英超嘅光環，有質素冇歐戰經驗都係蝕底。有經驗嘅利物浦同韋斯咸，喺歐霸當練二線兵，「一周雙賽」慢慢調整好，估計今屆喺歐洲會走得會幾遠；但國腳級極多嘅曼市雙雄同阿仙奴季初有唔少傷兵，尤其阿仙奴硬撼一場北倫敦打吡變甩皮甩骨，包括以往極少缺陣韋斯咸英超比賽嘅「億元先生」迪格蘭賴斯，半場因傷換走，比賽強度唔同、大戰太密係主因。兵工廠另一鐵人布卡約沙卡保持緊連續86場英超出賽紀錄，但場場成敵衛「攻擊」對象，隨時斷纜；就睇下達Sir學唔學到師傅哥帥，大膽啲用人，化危為機，成季咁長，條路先可以走得更遠更闊。
列強中最唔識收嘅睇怕會係紐卡素，球隊上下都冇乜歐戰經驗，返英超又唔留力大炒錫菲聯8粒；但油王班主話事後未攞過盃，明晚應會心雄想喺英聯盃打大佬曼城，哥帥之前曾攞4屆，心諗俾你威一次又如何？
