英超老薑

英格蘭最接近再攞世盃，係2018年殺入4強，當年戰至加時先輸畀克羅地亞，嗰個正選陣容「3-5-2」嘅黃金中場中間3人，迪利阿里、佐敦軒達臣同連格特，最後生嘅迪利阿里近一年冇出賽，黃金變銹鐵、最老嘅軒仔輾轉加盟褪色荷甲班霸阿積士；「連皇」等收山心態去亞洲玩韓職，仲有王牌箭頭哈利卡尼難耐英超長年冇冠生涯，去拜仁博一鋪。短短呢幾年間，頂級嘅三獅國腳持續快速換代，只因英超嘅「耗電量」驚人，企得住球會正選嘅「90後」三獅老將極少；其中33歲嘅曼城右閘基爾獲加，速度鬥心依然，三獅老薑之首。

今屆英超傷兵特多，新仔上流機會大增；但列強總要有啲三十幾歲、非土炮猛將撐住大局，逐鹿英超。首推當然係傳球似裝咗導航系統嘅曼城奇雲迪布尼、一夫當關嘅利記中堅華基爾雲迪積克、出場就會攞最佳獎項嘅阿仙奴中場佐真奴，同把握力超強嘅熱刺王牌孫興民，以及紅魔全能中場卡斯米路。時值季尾，優質老兵未必頂得住場場踢足，主帥識用先係護身符，爭霸一道殺著。