任何一段關係都有蜜月期，不過英超只係特別短，所以現役有兩個波士特別值得尊重。一個係服侍過4主，現時帶領韋斯咸做緊四哥嘅莫天才，今個月將會領軍突破600場英超，史上僅次雲加、費格遜同哈利列納。另一位係時任最長命英超領隊戴治，踏入第10個年頭，高山低谷陪般尼全走過；但蚊型班費捱到今屆已係第5季喺英超，9月中仲續約到2025年，今季最貴買咗一前鋒一後衛都係千萬鎊貨仔，戴治慳家識撈，但隊波見晒底，今屆唔識贏波，感覺上特別危。
今屆英超好癲，預計埋單有半數以上嘅英超隊，都已做或想擁有呢個炒領隊後嘅蜜月期，維拉、熱刺同曼聯呢刻最甜蜜；屈福特大炒過曼聯又打回原形，雲尼亞里可能都係幾個月貨仔，愛華頓嘅賓尼迪斯同李城嘅羅渣士，呢個聖誕囉囉攣。行運醫生醫病尾，紅魔新帥蘭歷克打出當今大熱嘅「逼搶」旗號，頭炮省招牌，當然令人有無限期望；年底前5支對手只係諾域治、賓福特、白禮頓、紐卡素同般尼，蘭Sir，想逼C朗點都得啦。