邊位先係真正嘅星級戰將？幫唔幫到球隊贏波，係重要指標。熱刺重將哈利卡尼，今晚歐聯鬥好似銅牆鐵壁嘅祖雲達斯防線，係今季「登基」前重要一役。英超球星密布，但幫到球隊贏波或者保住後方，筆者才認定係真正球星；所以超高薪嘅奧斯爾、阿歷斯山齊士同保羅普巴，有待證明。揾潛力股，紐卡素爆大冷氣走紅魔，再證「帶刀侍衛」科利安利祖尼，非池中物；水晶宮冇翼鋒費韋特沙夏一個扭幾個，贏波機會每減半。
周薪基本攞緊11萬鎊嘅卡尼，正力爭成為繼前輩舒利亞後，另一位3連霸嘅英超神射手。熱刺下季起好新球場，但卡尼來季去向，可能喺世界盃後先揭盅，會唔會出國沖天飛，歐聯呢個舞台係佢嘅實力指標。卡尼今季入波，熱刺勝率約有七成二，今屆佢鬥多蒙特兩仗入3球，鬥皇馬則食白果。主要由保方守龍嘅祖記，已11連勝兼期間只失1球，熱刺亦勢強，英超水準勝意甲，隊友一味將波交俾佢，會係長期大勇嘅卡尼，今晚擊破保方一大助力。