蘇B走人，唔係突然嘅事，但話咁快出聲明講卡域克做替工，今屆再搵個都係暫代領隊，到下季先有新帥上場，做法唔太合理。西甲巴塞有難，八方支援；曼聯財雄勢大，要買人換血又冇難度，居然冇人夠膽或者啱格拉沙家族心水即刻接手，可見費Sir走咗8年幾，留下嘅問題愈積愈多，要成功面試做好呢份工，法國球王施丹都未必得。
今屆英超三雄之爭成定調，問題係曼聯最多爭第4名踢歐聯，現時喺歐聯分組賽出線勢頭唔差；國內得返英足盃可爭，究竟4季冇捧過盃嘅紅魔，今季重心放喺邊？場場出C朗擔正，呢度唔係意甲，對呢位36歲嘅葡國球王係不可能，唔會襟玩，但有冇波士敢放呢位大哥喺後備席？年輕係英超未來，曼聯一班後生可畏包括連格、雲迪碧克，達洛治、查頓辛祖甚至最有前途嘅格連活特，都唔太受重用。隊波大佬就多，淨係保羅普巴同隊長哈利馬古尼，一個心有病、一個淨識扮高章；唔理上任嗰位係短約定長工，開唔到費Sir當年嘅「吹風機」鬧醒呢班大帝，再俾屈福特之流大炒，今屆或再重演。