歐國聯中「毒」更深
歐國聯成立，令實力接近嘅對手同組比拼，好似A級聯賽大戰連場，商業吸引力大增；但大牌球星不論喺球會同國家隊，都要繼續場場搏到盡，「FIFA病毒」更深。英格蘭前屆歐國聯A組包尾，上屆落B組攞返首名，今屆又升返班，但對佢哋喺近年大賽嘅真正影響根本唔大。既然歐國聯只係一場又一場嘅星級表演騷，「三獅」主帥杜曹係咪應該仿效巴西嘅安察諾堤同德國高普，敢用新人落場踢國家隊，嘗試殺出一條新路？
三獅多年成敗都仲係靠哈利卡尼，今次入選嘅另一個中鋒卡維特利雲唔會再有太大進步，咁當紮嘅摩根羅渣士同安東尼哥頓喺咪可以試打9號位？般茅中場阿歷斯史葛有機會係下一位1億鎊先生，小球會大國腳，踢國際賽更肯搏命提升身價，杜曹應好好利用英超大量優質貨源。
最擔心嘅歐洲班霸教頭，呢刻應係皇馬嘅摩連奴，4線都已出現國腳級傷兵；現在只係祈求三獅攻中祖迪比寧咸下周平安回歸，否則已喺西甲落後巴塞6分嘅皇馬，今季都係疊埋心水爭盃賽好過。