MIRROR成員AK江𤒹生近日喺演唱會記者會上，被指態度欠佳。有報道形容佢「全程黑面」，冇打招呼，接受訪問時又明顯不耐煩，敷衍回應。訪問片段引發網上熱議，有人批評佢冇禮貌，作為公眾人物，面對傳媒提問即使唔想回答，亦應該保持專業；另一邊廂，有粉絲撐佢只係真性情、唔想回應私人問題，反指記者成日問問題都語帶挑釁。
相比起單純討論AK「有否」及「應否」黑面，我反而覺得，呢場風波亦係反映娛樂記者今時今日嘅角色同地位。回想起幾十年前嘅娛樂圈，娛樂版係藝人宣傳嘅重要渠道。專輯、電影、演唱會，要接觸大眾觀眾，好大程度依賴報章娛樂版、雜誌專訪及電視娛樂新聞。藝人同經理人公司自然十分重視同傳媒嘅關係，哥前哥後，姐前姐後。而娛樂版亦以搶眼標題為生，所以娛記一向尖銳，而藝人即使心裡幾咁不服，表面都保持一定程度嘅客氣同尊重。但到咗社交媒體年代，情況已經完全改變。粉絲唔需要再依賴傳媒，直接追縱藝人嘅社交平台，獲得第一手消息，加上各大娛樂公司都有自己嘅平台，宣傳片自己拍，訪問自己做，幕後花絮自己出，甚至連新聞都直接透過社交平台發放，實行「自己藝人自己捧」。傳統娛樂記者嘅角色及影響力大不如前。而現實，當藝人不再高度依賴娛樂版曝光，過去嗰種必須維持良好關係嘅壓力自然大減，直接啲講，唔少藝人未必覺得再需要向娛樂記者「買帳」。
即使娛樂版真係因為時代而式微，我相信尊重人呢件事仍然係不會過時。「真性情」與「冇禮貌」始終係兩回事，面對再尖銳嘅問題，可以有唔同嘅方式回答，但冇必要用情緒去回應。
執筆之時，見到AK出席活動時已主動道歉，承認自己態度唔好，亦唔想影響到團隊，我覺得呢個做法值得肯定，因為真正成熟嘅藝人，唔係永遠都唔會犯錯，而係犯錯之後懂得如何體面地處理，我認為有呢種風度，先真正叫做型。