福斯集團今年好多新搞作，繼葉念琛執導，謝君豪、出爐影后惠英紅及黃秋生主演嘅華語劇《心冤》，以及吳鎮宇、張孝全嘅《香港華爾街》後，旗下嘅國家地理(National Geographic，下稱NG)頻道亦推出首部電視劇《世紀天才》(Genius)。咪以為拍開紀錄片嘅NG，轉拍劇集會唔在行，淨係睇台前幕後都係金像級人馬就知，佢哋真係誠意十足。
文：Wing
《世》改編自Walter Isaacson暢銷傳記《Einstein：His Life and Universe》。
《坐看雲起時》的Johnny Flynn飾演年輕版愛因斯坦。
唔止要睇幾位主角演技鬥法，仲要欣賞埋精細華麗嘅美指。
《有你終身美麗》金像拍檔炮製
劇名所講嘅天才，指嘅係二十世紀最偉大科學家之一愛因斯坦。一聽個名就知，呢部係人物傳記劇集，呢類型影集嘅高低手之分，好多時視乎取材，亦即是用咩角度去睇主角。《世》劇嘅「原材料」大有來頭(版權費亦以天價計算)，改編自美國知名傳記作家《喬布斯傳》作者Walter Isaacson07年作品《Einstein：His Life and Universe》。製作班底方面，NG搵嚟《有你終身美麗》金像拍檔朗侯活及白賴仁基沙擔任導演、監製；而演員方面亦屬超班金像級人馬，包括飾演愛因斯坦嘅《鋼琴師》雙料影帝謝菲路殊，及飾演愛因斯坦第二任妻子嘅金像提名影后艾蜜莉華森。
改編自《喬布斯傳》作者名作
由於市面上早有N本關於愛因斯坦嘅傳記小說，原著作者Walter另闢蹊徑，憑多封被公開嘅愛因斯坦私人信件，從佢嘅怪習慣、崎嶇婚姻及感情生活角度出發，寫成一個反映呢位偉大科學家叛逆一面嘅故事。話明係改編，《世》劇當然忠於原著宗旨。愛因斯坦最為人所知嘅係佢嘅科學理論成就，以及與多名知名科學家嘅友情，但感情生活方面，後世除咗知道佢有過兩段婚姻外，其他嘅感情支節仍有好多不解之謎。
揭露偉人婚外情
《世》劇主線講述愛因斯坦嘅生活及婚姻，利用flash back手法及平行時空嘅剪接技巧，由佢少年時代放棄於德國升學，轉而到瑞士讀大學講起，然後開始講述佢嘅浪漫史、政治風波及捲入國際政治鬥爭等經歷。由朗侯活執導嘅第一集，第一幕已經拍攝愛因斯坦同美女助理，喺教室中除晒褲挨住黑板啪啪啪，唔夠幾分鐘，場景就轉至佢於家中同第二任太太，為咗希特拉上門追查一事而爭拗，而且美女助理亦在場；劇中亦有提及希特拉及反猶太人嘅政治社會背景，不過都係穿插於主線中，輔助說明。
《世紀天才》逢周日晚上10時於國家地理頻道(有線電視52台、now寬頻電視215台)播出。
過去有唔少影集及電視電影講述過愛因斯坦嘅故事，而飾演過愛因斯坦嘅演員亦多不勝數(以Albert Einstein命名的角色)，因應影集嘅取材及劇本角度，衍生出不少形象不同嘅愛因斯坦。
Vincenzo Amato
意大利電影金像獎最佳男主角Vincenzo Amato曾於08年嘅電視電影《Einstein》中飾演愛因斯坦，故事以佢同首任妻子米列娃嘅感情史為主線。
Andy Serkis
近年已經成為「怪獸」代表演員嘅Andy Serkis，08年曾經同《哈利波特》系列嘅David Tennant主演電視電影《Einstein and Eddington》，講述愛因斯坦同英國科學家Arthur Eddington嘅故事。
Walter Matthau
已故金像最佳男配角Walter Matthau曾於94年電影《I.Q.》中飾演愛因斯坦，此片屬於愛情喜劇，講述鬼馬又風趣嘅愛因斯坦幫助一個男仔扮科學家追求自己姪女。
James Jaysen Bryhan
2015年嘅英國短劇《Genius》，搵嚟James Jaysen Bryhan飾演年老版愛因斯坦，故事主題近似於《世紀天才》，講述愛因斯坦反叛一面，以思想封閉嘅納粹德國為背景，描繪主角如何於當年追求自由及夢想。
