李浩森跳唱《一見你就笑》引爆全場。
歌唱真人騷《中年好聲音2》昨晚播出的第3集，共有32位選手登場，當中誕生了3位5燈選手。第一位5燈選手是43歲的李浩森，他曾是第一屆《超級巨聲》參賽者。身為歌唱導師的浩森獻唱《一見你就笑》，他又唱又跳引得全場high爆一齊Un，肥媽更是未夠廿秒就撳燈，大讚：「你唔係以舊方法去唱，你用新嘅方法去演繹，令到大家好輕鬆。」伍仲衡則笑言：「我略嫌你唔夠癲，曳啲啦！」說罷他便企起身示範，場面搞笑。
古淖文高大又有型，獻唱英文歌《A Change Is Gonna Come》勁有騷靈感。
第二位5燈選手是35歲的古淖文，來自澳門的他報稱是藝人及司儀。身為混血型男的淖文，高大又有型靚仔，他選唱Sam Cook英文歌《A Change Is Gonna Come》大晒騷靈唱功，成功贏得5燈，陳慧嫻興奮大讚：「你今日唱得好正，你企出嚟已經係巨星風範，你已經唔係參賽者，我當咗你係巨星！」
朱博文跳唱《頭髮亂了》，台風十足。
第三位5燈選手則是39歲的朱博文，他報稱是財富管理經理。朱博文跳唱歌神張學友的《頭髮亂了》，其間大晒超強假音，表演尾聲再chok一個型仔pose，台風十足。伍仲衡大讚：「你一出聲就一鳴驚人，唱得非常之好！」張佳添則笑言：「你係一個Un唱歌手，臨尾整呔嗰吓好正，我好鍾意。」
