古巨基音樂企劃「I Really Love To Sing」第二炮請來MC張天賦合作,日前推出歌曲《自我安慰》合唱版。昨晚,基仔與MC於IG開Live為粉絲解構新歌、MV拍攝及合作契機。
MC坦言這次跟基仔的合作十分「夢幻」,因為從小便聽他的歌,沒想過竟然能夠有機會一齊合作,並指對方「咁多年嚟一啲都冇老到」,又即場問他保養心得。基仔笑言MC還年輕,未有需要用到保養技巧,隨後卻靈機一觸表示:「呀!我知啦!有一個保養技巧呀,就係娶一個會幫你保養嘅老婆呀!」MC隨即大笑,基仔續說:「因為我自己真係唔識保養㗎,每日古太臨瞓前或者我臨瞓前,會幫我搽晒啲面,排晒一支二支,我諗嗰度有四五六七支嘢咁啦,由右到左,古太會話『你而家未洗面呀,咁臨瞓前就自己搽啦』。如果我洗咗面,佢就幫我搽囉。我真係唔識保養,但如果真係要問我嘅方法,就係搵一個幫你保養到嘅老婆吖。」聽罷MC立即豎起手指公讚好,基仔借分享保養心得,同時又乘機冧太太,認真識做。
基仔建議《記憶棉》加入《自我安慰》
直播期間,有網民問到《自我安慰》前奏及中段過場均用上《記憶棉》的旋律是誰的主意,基仔解說是他在錄音時忽發奇想,「喺錄音嗰兩日裡面,聽聽吓突然覺得,既然我哋一齊合作,你嘅《記憶棉》又係關於感情上一啲失落,匿喺個被窩裡面,再接呢個《自我安慰》,好似係一個治療同解脫,所以我就同舒老闆(監製舒文)提議,再話俾你知,見你又鍾意,咁就啱晒啦。」
MC感激基仔送耳機
MC又提到錄音期間發生了一段小插曲,「嗰一日錄歌我冇帶耳機,我就借咗舒老闆嘅一個ear monitor去錄音,我覺得聽得好舒服。之後古sir好好人喺拍MV嗰日就送咗隻呢個耳機俾我,多謝多謝。因為個耳機要send去倒耳模,啱啱拎咗去整,所以未能喺啱啱同洪嘉豪個show戴到,但我下一個show我係會用呢個耳機上台㗎。」同時他又即場問古Sir有無私人logo,希望將古Sir嘅logo交給廠商刻在耳機殼上面陪自己開show,基仔立即爽快答應:「好好好,我答應你,我即刻整個logo出嚟。」
MC未透露個唱舉行地點
隨後基仔又代「賦二代」(MC粉絲)追問:「我睇報導寫,你嚟緊準備有一個新嘅演唱會呀 ?」MC回應 :「係啦!日子就未確實公佈到啦。但係會喺一個都幾大嘅地方嚟嘅,會係我嘅一個個人演唱會,或者到時有你做嘉賓都唔定㗎。哈哈……我咩都唔講得住呀,大家期待下啦!」
直播結束前,基仔再次大讚MC唱歌根柢好,坦言在他眼中MC額頭真的寫了「我真係好鍾意唱歌」。基仔回憶看過MC出道前的片段時說道:「因為我睇你去busking周圍拎住個結他盒擺喺個路度唱歌,完完全全就係我今次個project名『I Really Love To Sing』,你真係一個好鍾意唱歌嘅人又唱得咁好,所以今次真係非常多謝你一齊同我做呢個project。」