新巴公布咗最後一班「常規路線」係邊條路線。(資料圖片)
新巴專營權即將併入城巴專營權一，結束服務乘客25年嘅品牌。城巴今日(26日)預告，用新巴牌頭營運嘅「常規路線」最後一班車，會係7月1號凌晨約1點半由長沙灣(甘泉街)開去香港仔嘅970X線。
呼籲上唔到車嘅乘客盡快離開
城巴透露，嗰晚會同一時間安排不多於4部車接載乘客，又話已經預計當日會有大批乘客到場送別新巴，呼籲上唔到嘅人應該喺尾班車開出之後，盡快離開現場，避免喺現場聚集。
至於全新嘅城巴(市區及新界巴士網絡專營權)，將會喺7月1號凌晨投入運作。城巴話，合併後嘅頭班車會係凌晨4點由小西灣(藍灣半島)開嘅N8P通宵線，循環來往灣仔港灣道。城巴嗰晚將會加派人手同調動車務資源，喺長沙灣維持秩序同令專營權順利交接。
