Ray Online｜立法會餐廳引入兩部送餐機械人　稱「立仔」和「立女」

飲食業出現人手荒，立法會餐廳亦唔可以倖免。立法會主席梁君彥喺社交網站分享，秘書處近日試用兩部送餐機械人，叫做「立仔」同埋「立女」。佢哋仲要身兼多職，兼任STEAM教育宣傳大使𠻹。

梁君彥話希望「立仔」同「立女」可以幫輕辛勤工作嘅餐廳員工，形容佢哋體型輕巧、行動靈敏，喺餐廳穿梭往來，送餐可以話係快、穩、準啊！「立仔」同「立女」仲兼任STEAM教育宣傳大使，梁君彥今日就介紹畀一班同學仔認識，同學仔非常雀躍，唔止圍住機械人，仲跟住機械人行路。

學生可近距離認識機械人操作

梁君彥提到同學仔喺坊間嘅餐廳，就算見到送餐機械人，都好難有機會了解實際操作。但去到立法會參觀，就可以去餐廳睇睇，聽吓導賞員介紹，近距離認識機械人嘅操作，希望可以引發同學仔對創新科技嘅興趣。

其實「立仔」同「立女」嚟自一間2019年成立、由科技園培育嘅機械人科技公司。公司透過人工智能、IoT（物聯網）同5G等技術，令機械人運作更加智能，提升工作效率。新冠疫情肆虐期間，機械人就率先喺醫院隔離病房負責送餐，減輕醫護人員嘅工作壓力同感染風險。疫情過後，機械人喺醫院同食肆嘅應用都愈嚟愈廣泛。