Ray Online｜金管局fb證實「外星人」出席峰會消息惹網民嘲笑。(FB@香港金融管理局 Hong Kong Monetary Authority)
有一種搞笑，叫自以為好搞笑。金管局噚日（31日）喺Facebook出post，大字標題寫住「外星人雲集香港！」，仲附有帖圖標明「金管局證實消息，外星人將來港出席峰會」，又有「文件」同「報道」，擺明想吸引網民關注。
仔細一睇，金管局帖文原來喺宣傳下星期舉行嘅國際金融領袖投資峰會，有超過300位中外金融界星級人物參與，由本月6至8日一連三日參加歡迎晚宴、主峰會同埋研討會。
網民指尷尬味濃
至於「外星人」何謂也？就係上面已經提及嘅中「外」金融界「星」級「人」物，真係估佢唔到。之不過網民似乎唔係太受落，反問「係咪要笑架」，亦有指「尷尬味濃」，有網民就表示「有藍剔」，似乎係信唔過金管局fb 竟然係咁嘅水平。有啲網民就估計，條橋係老細自己度出嚟，前線唔敢反抗唯有照出post。
但而家個帖文咁多人關注，無論係真搞笑，定係暗黑兵法，宣傳投資峰會嘅目的都算達到咗，但唔知呢班金融界星級人馬下星期嚟到香港，知道畀金融局擺上枱形容係「外星人」，會有乜嘢感受呢？
