奧巴美揚剛戰喺阿仙奴每季最重視嘅聯賽對碰，鬥北倫敦死敵熱刺；因違反隊規被貶，只見呢位視為亨利之後嘅一代球會射手，全程黑面，件事喺英國球圈嘅爆炸性，唔輸蝕得過王室花邊新聞。
大牌高薪唔出，主帥阿迪達之前對待「大眼仔」奧斯爾已做得出，奧巴頂上大眼仔份球會頂薪，未能以身作則；突出走陪伴病母，一月尾起缺陣球會多場比賽，阿仙奴提早衛冕英足盃失敗，尚可理解，但之前在疫情下走去紋身已為人詬病。今次喺上周四歐霸後嘅兩、三天發生過乜事，令佢再違隊規，主帥終手起刀落，帶出嘅訊息除咗係阿仙奴重歐霸多於聯賽、少帥新人外，亦證明唔止阿仙奴，好多支英超強隊嘅兵源充足度，不斷輪換會變常態，所以預期今季喺歐洲兩大盃賽，會成壟斷之勢。只要你睇下呢場兵工廠新星伊美路維同奧迪加特兩大攻中夾熟後，球會正箭頭拿卡錫迪多數作擾敵幌子，那誰再說一定要奧巴？阿仙奴現在最想，應該係季尾買斷皇馬借將奧迪加特。冇買斷條款？皇馬應該幾等錢使。