球王美斯被逼離開西甲，唔止係財困巴塞嘅哀歌，連續9季由皇馬、巴塞同馬體會壟斷聯賽榜三甲席位，今季極大機會瓦解。先睇馬體會近屆由施蒙尼執教，先求穩守，上屆多咗34歲嘅巴塞棄兵蘇亞雷斯，即能重奪失落6屆嘅聯賽冠軍；但以上屆歐聯成績做指標，呢三雄其實水鬥水。再睇三強今夏嘅買人策略，巴塞免費簽入荷蘭射手迪比、艾歷加西亞同阿古路，皇馬免費簽阿拉巴，馬體會算最巴閉，用成2千多萬鎊，簽入當打巴西中場國腳迪保羅。呢3強收回唔少外借兵當擴軍，冇埋美斯，成個西甲星味大減；似步意甲早年後塵，洗盡鉛華，反有利年輕球員上位。
C朗鬥美斯，就當西甲美好回憶。意甲近年水準唔高，但國家隊喺今夏歐國盃，一樣打低身價高幾倍嘅英超三獅兵。狂牛近年喺國際大賽交到貨，剛喺奧運決賽鬥到加時輸俾巴西，當中皇蘇代表奧耶沙巴爾，蘇比文迪同米基爾馬連奴都搶鏡。皇蘇上屆西甲第5，今屆要喺後美斯年代搞局，呢支巴斯克地區球隊最有資格。