對列強無乜所謂嘅「歐國外」即將開鑼，喺呢個時候跳糟轉籍，對20歲嘅韋斯咸中場小將迪格蘭賴斯(Declan Rice)，係上位大好良機。呢粒「米」(rice)曾代表愛爾蘭國家隊踢友賽，上季踢英超冒起，喺「槌仔幫」長拍大佬麥克盧保打雙防中，今屆個人英超成功攔截率，比上季不進反稍跌；而排喺中游嘅韋斯咸，暫時失球數字比一啲中下游球隊仲差，所以賴斯仔未算爆得起。
不過，爆唔爆得起，有時係睇隊友同對手。睇番英格蘭今輪兩場歐國外嘅對手，只係捷克同黑山，「三獅兵」近一年喺法定時間比賽，只係輸過俾比利時同西班牙兩支歐洲一線隊，踢歐國外應冇乜壓力。前線都話有哈利卡尼同史達寧呢類頂級射手，但入選嘅中後場兵就認真麻麻；除咗賴斯，另外6位中場，全部踢緊季尾爭到頭崩額裂嘅Big Six，兼超過一半唔係球會必然正選。對上一位由愛爾蘭轉籍英軍嘅「新星」，係仲踢緊英冠維拉嘅基亞利殊，「殊仔」到依家都仲未代表過英格蘭大國腳，粒「米」運氣點都會好一啲啩。