今晚上演多場國際友誼賽，當中德國主場迎戰英格蘭最為吸引。今場係前鋒普多斯基嘅國家隊告別賽，預料會正選掛帥，相信隊友會盡量製造入球機會俾佢。德國喺世界盃外圍賽表現強勁，4戰全勝入16球兼一球不失，穩坐首位。英格蘭領隊修夫基重召咗新特蘭老將迪科爾，雖則新特蘭暫列英超包尾大幡，但迪科爾今季有不俗表現，聯賽攻入14球，加上哈利卡尼因傷落選，今仗同下場世盃外圍賽對立陶宛，佢都好大機會正選上陣。英軍喺世盃外圍賽表現亦唔錯，4戰取得3勝1和排小組首位。對賽方面，英軍近4次到訪德國，錄得3勝1負，明顯佔優，不過兩隊過幾日有外圍賽跟尾，預料今場唔會盡全力，大有機會握手言和。