今晚歐聯8強首回合有場重頭戲，由拜仁主場迎擊皇馬。拜仁剛喺國家打吡主場4比1大勝多蒙特，德甲領先次席嘅RB萊比錫10分，剩餘6輪聯賽，捧盃只係遲早嘅事。佢哋今屆歐聯主場強勁，4戰全勝，曾大炒羅斯托夫、燕豪芬及阿仙奴，安聯球場威力驚人。前鋒羅拔利雲度夫斯基狀態大勇，聯賽累積26球暫列射手榜首位，一對翼鋒洛賓及列貝利狀態亦唔錯，中場堤亞高艾簡達拿今季為隊友製造唔少入球，可謂無名英雄。皇馬近況亦相當強勁，聯賽加盃賽9場不敗(7勝2和)，目前少踢一場下領先第二嘅巴塞3分。佢哋今季歐聯作客成績尚算平穩，4戰取得2勝2和不敗。皇馬近6次到訪拜仁，錄得1勝2和3負蝕，兩隊貴為聯賽「一哥」，實力可算係半斤八両，但拜仁佔主場優勢，可睇高一線。