如果GDP連續兩季負增長，可確認經濟陷入技術性衰退，咁英超Big Six近期持續鬥演劣作，已陷入近年少見嘅亂局。放頭嘅「紅、曼」回氣中，曼聯及熱刺近6場聯賽僅贏1場排中游；阿仙奴失去贏波觸覺，領隊艾馬利帥位不穩。對上一次Big Six非包辦前6名，已是2015至16年，即係李斯特城神奇封王嘅一季；如今佔據前三的「狐狸」又再上前搞局，管理層眼光「泰」出色。
要破局唔易，始終Big Six兵厚財力足，而且環顧現時中上游球隊錫菲聯、般尼茅夫同白禮頓嘅前鋒級數唔夠，狼隊沉迷歐霸，已傷痕纍纍。反而狐狸4季前封王後，大部分功臣、功勳領隊及上年意外離世的班主維猜功成身退，但逐季賣走尼高路簡迪、馬列斯及哈利馬古尼籌得大量資金重組，又有眼光聘得羅渣士任教，今夏實際用咗唔夠2,000萬英鎊。隊波仲係由32歲嘅英超領先射手占美華迪帶領一班小將打「4-1-4-1」陣式快攻，最強係唔使踢歐戰，陣容固定，嚟緊主場鬥阿仙奴再贏嘅話，英超就會進入新Big Four時代。