躋身全球薪酬最高嘅足球聯賽，英超球員喺現時新冠肺炎疫情肆虐全球下，更應以身作則；可惜英格蘭球員自恃藍血，叫價偏高，往往教人最失望。繼阿士東維拉隊長基亞利殊叫人留家，自己卻出去開派對「炒車」，來季投「魔」現暗湧；另一曾貴為「三獅」第一右閘嘅基爾獲加，近日更被揭發叫公眾留家避疫，但自己卻喺私竇召妓開性愛派對，實教作為全英超球員薪酬平均最高、今季達13.7萬英鎊周薪嘅曼城會方，情何以堪。
英超球員傾緊減薪三成，以揾緊周薪11萬鎊嘅基爾獲加為例，唔會入肉；不過就快30歲嘅獲加，同曼城嘅合約剩番兩年，以一向唔重用土炮嘅曼城，呢類只靠速度揾食嘅英格蘭球員盛年漸過，加埋呢鋪「傑作」，下年續約機會幾微。再睇番三獅現時最勁右閘，係廿歲出頭嘅阿歷山大阿諾特同雲比沙卡，恐怕基爾獲加下年連入選歐國盃決賽周機會都未必有，到時叫價更低；受過教訓，keep好啲仲可踢多幾年收山，否則匆匆十數年光輝球員生涯，眨眼就過。